စစ်ကောင်စီတပ်မှ ဓာတုလက်နက်သုံးကာ ထီးချိုင့်မြို့အား ပစ်ခတ်
စစ်ကောင်စီနှင့် တော်လှန်ရေးတပ်ဖွဲ့အကြား တိုက်ပွဲပြင်းထန်လျက်ရှိသော စစ်ကိုင်းတိုင်း ၊ ထီးချိုင့်မြို့အား စစ်ကောင်စီက လေကြောင်းဖြင့် ဓာတုလက်နက်သုံး ပစ်ခတ်ခြင်း၊ ဗုံးကြဲခြင်းများ လုပ်ဆောင်ခဲ့ကြောင်း Northern ABSDF မှ တာ၀န်ရှိသူတစ်ဦးက CJ Platform သို့ပြောသည်။
ဒီဇင်ဘာလ ၁၅ ရက်နေ့ နံနက် ၁၀ နာရီ အချိန်တွင် တိုက်လေယာဥ် နှစ်စင်းသည် ထီးချိုင့်မြို့ ပတ်ဝန်းကျင်သို့ ပေါင် ၅၀၀ ဗုံးများ ကြဲချသည့်အပြင် လေယာဥ်ပေါ်မှ စက်သေနတ်ဖြင့် ပစ်ခတ်ခဲ့ကြောင်း သိရသည်။
စစ်ကောင်စီ လေယာဥ်ဗုံးကြဲမှုကြောင့် ပြည်သူ့တော်လှန်ရေးရဲဘော်များ အထိအခိုက်မရှိသော်လည်း နေ့လယ်ပိုင်းအချိန်တွင် မူးဝေအော့အန်မှုများ ဖြစ်ပေါ်ခဲ့ကြောင်း Northern ABSDF ၏ တာ၀န်ရှိသူတစ်ဦး၏ ပြောဆိုချက်အရ သိရသည်။
” ပစ်ခတ်မှုအပြီး ၂ နာရီ ၃ နာရီပတ်ချာလည်မှာ မီးခိုးငွေ့ကို ရှုမိတဲ့သူတွေ မူးဝေအော့အန်တာမျိုးဖြစ်ခဲ့တယ်” ဟု အထက်ပါတာ၀န်ရှိသူက ဆိုသည်။
ထိုမူးဝေအော့အန်သော ရဲဘော်များမှာ အသက်အန္တရာယ် မစိုးရိမ်ရကြောင်း သိရသည်။
၄င်းနည်းတူ နိုဝင်ဘာ ၂၃ ရက်နေ့တက တရုတ်နယ်စပ် နမ့်ခမ်းမြို့ စခန်းသစ် လုံခြုံရေးကုန်းကို တအာင်း အမျိုးသားလွတ်မြောက်ရေး တပ်မတော် (TNLA) က သိမ်းပိုက်ထားချိန်၊ ရှမ်းမြောက် နမ့်စလပ်စခန်းကို စစ်တပ်က ဓာတုဗုံး(၄) လုံးနဲ့ ပစ်ခတ်ခဲ့ပြီး ၊ ဒီဇင်ဘာ (၃) ရက်နေ့တွင် ပလက်ဝမြို့နယ် တရွန်အိုင် ဗျူဟာနှင့် နှုံးဘူး ဗျူဟာ စခန်းကုန်းတိုက်ပွဲများတွင် စစ်တပ်က Chemical Warfare Agents ဓာတုဓာတ်ငွေ့ ဗုံးများကို တိုက်လေယာဥ်မှ ကြဲချတိုက်ခိုက်ခဲ့မှုများ ကျူးလွန်ခဲ့သည်။